عیبادی و ئەمریکا هەڵبژاردنەکانی ساڵی داهاتووی عیراق دوادەخەن

بەهۆی گەشەسەندنی هەژمونی ئێران لە عیراق و سوریا و زاڵبونی هیلالی شیعی لە رۆژهەڵاتی ناوەڕاست کە بەیروت و دەریای ناوەڕاست بە تارانەوە گرێدەداتەوە، ئەمریکا ترسێکی گەورەی لێ نیشتووە کە نەتوانێ تاکە هاوپەیمانی خۆی کە حەیدەر عیبادی سەرۆک وەزیرانی ئێتسای عیراقە، خولێکی تر بکاتەوە سەرۆکی کابینەی داهاتووی بەغدا.

ئێستا گروپی مالیکی و ئەو پارت و باڵانەی راستەوخۆ سەر بە ئێرانن پێداگیری لەسەر ئەنجامدانی هەڵبژاردن دەکەنەوە کە لە کاتی خۆیدا، هۆشداری ئەوەش دەدەن کە نابێ بەهیچ شێوەیەک ئەم هەڵبژاردنەی داهاتوو دوا بخرێت، بەڵام بەهۆی ئەوەی کۆشکی سپی گرەوەکانی خۆی هەمووی لەسەر عیبادی هەڵخستبوو، تەنانەت کوردو قەوارەی هەرێمی کوردستانیشی بەهۆی هەڵەکانی برێت مەکگورکەوە کردە قوربانی گەمەیەکی سیاسی لێڵ و نەبراوە، بۆیە ئێتستا لە واشنتنەوە ترسێک هەیە کە ئیدارەی ترمپ دوا هاوپەیمانی خۆی لە عیراق لە دەست بدات و لە ئەنجامدا بەرامبەر بە کشانی هەژمونی ئێران توشی دۆڕانێکی سیاسی و ستراتیژی و دیپلۆماسی گەورە بێتەوە، چونکە بە دوور نازاندرێ عیبادیش لە پێناو مسۆگەرکردنی پاشەڕۆژی سیاسی خۆی روو لە تاران بکات ئەگەر پشتیوانی کۆشکی سپی دادی نەدا.

وەک ئاشکرایە، ئەمریکا لە هەوڵی ئەوەدایە جارێکی ترو بە ئامانجی سەرخستنەوەی حەیدەر عیبادی، کورد وەک کارتێکی هەڵبژاردن و یەکلاییکەرەوە بێنێتەوە ناو گەمە سیاسییەکان، بەڵام بەهۆی ئەوەی کورد و سیاسییەکانی کوردستان و بە پاساوی ریفراندۆمەوە گورزێکی کوشندەو کەمەرشکێنیان بەرکەوت، بۆیە مسۆگەر نییە ئاخۆ هەولێر جارێکی تر هێلکەکانی خۆی دەخاتەوە سەبەتەکەی مەکگورک و لە رێی ئەویشەوە کۆشکی سپی و پێنتاگۆن؟

ئەمریکا نەک هەر لە بەرەی ئێران و هاوپەیمانەکانییەوە گەمارۆ دراوە، بەڵکو تورکیاش بەهۆی نزیکبوونەوەی لە مۆسکۆ خەریکە لە دەرگای عەفرینەوە بەڕەکە لەژێر پێی ئەمریکا دەربێنێ و رێککەوتنیش لەگەڵ ئەسەدا بکات بۆ بەرەنگاربوونەوەی کورد و رۆژئاوا، کە ئەمریکییەکان بە پێگەی گرنگی خۆیانی دەزانن!

هێشتا یارییەکان هەر بە لێڵی دەمێننەوە تا ئەو کاتەی ئەمریکا لە دەرنەچوونەوەی عیبادی دڵنیا دەبێتەوە، ئەوسا ئەگەرەکان وای نیشان دەدەن کە ئەمریکا جارێکی تر کورد بەکار بێنێتەوەو سەرجەم ناوچە کوردستانییەکانی ١٤٠ی بخاتەوە بەردەست و دانیش بە ئەنجامی ریفراندۆمەکەدا بنێ، ئەمەش وەک سزایەک دەخوێندرێتەوە بۆ بەغدا بەهۆی ئەوەی لە رێڕەوەی ئەمریکاو ستراتیژەکەی لە رۆژهەڵاتی ناوەڕاست لا ئەدەن.

هەندێ شارەزا باس لەوە دەکەن کە ئەگەرچی ریفراندۆم کوردی لە دەسکەوتێکی نەتەوەیی گەورە سفر کردەوە، بەڵام هێشتا وەک کارتێکی کارا لەژێر دەسەڵاتی ئەمریکادا دەمێنێ بۆ ئەوەی بەردەوام نیشانی بەغدای بدات، چونکە بەپێی پسپۆرانی یاسایی و دەستوری هیچ دەسەڵاتێک نییەو بتوانێ ریفراندۆم هەڵبوشێنێتەوە چونکە لە دەسەڵاتی راستەوخۆی دەنگدانی گەلەوە سەرچاوەی گرتووە.

بەدواداچوونی نیشان پرێس

Print Friendly, PDF & Email