سەرۆک کۆمار: بەداوای لێبوردنەوە ئەمساڵ جەژنی رەمەزان ناکەم

لە وتەیەکیدا کە لە پێگەی فەرمی سەرۆکایەتی کۆماری عیراق بڵاوکراوەتەوە، ئەمڕۆ سەرۆک کۆمار رایگەیاند کە ئەمساڵ جەژنی رەمەزان ناکات. لە وتەکەیدا فوئاد مەعسوم ئاماژە بۆ ئەوە دەکات کە چاوەڕێی جەژنێکی پڕ لە خێرو خۆشی بوو بۆ عیراق، بەڵام گروپە تێرۆریستییەکان جارێکی تر دڵرەقی خۆیان لە دوایین تەقینەوەکانی گەڕەکی کەڕڕادەو شەعب بەسەر خەڵکی عیراق سەپاندەوە.

سەرۆک کۆمار لە وتەکەیدا، بە داوای لێبوردنەوە، رایگەیاند، وەک ماتەمینی‌و رێزلێنانێک بۆ قوربانیانی هەردوو تەقینەوەکەی بەغدا، جەژنی ئەمساڵی رەمەزان ناکات.

لەو وتەیەدا، فوئاد مەعسوم جارێکی تر داوا لە هێزەکانی ئاساییش دەکاتەوە کە بەوپەڕی وریاییەوە رێکارەکانی پاراستنی خەڵک بگرنەبەر بۆ ڕاونانی تێرۆریستان‌و خانە نووستووەکانیان.

هەروەک سەرۆک مەعسوم داوای لە پەرلەمانی عیراق کرد راستەوخۆ دوای جەژن دەست بە دانیشتنە ئاساییەکانیان بکەنەوە بۆ ئەنجامدانی ئەرکەکانیان لە چاودێریکردن، بێ هێچ دواخستنێک.

Print Friendly